Diary 18th Jan 09

ဘာကြောင့်ရယ် မသိဘူး.. နောက်ပိုင်း ဘလော့ရေးတဲ့အခါ အရင်ကထက် ပိုပေါ့ပါးလာတယ်.. အခုရက်ပိုင်းတော့ စိတ်ဖိစီးမှုလျော့ကျမယ့် အလားအလာတစ်ချို့ ရှိနေတယ်..ကျွန်တော် ဝင်ပါထားတဲ့ ကျောင်းက Activity Club တစ်ခု.. အဓိက လှုပ်ရှားမှုတွေ တော်တော်များများ ပြီးသွားပြီ.. ဆုပေးပွဲတစ်ခု မတ်လ ၂၈မှာ ရှိတယ်.. ဆရာက ကျွန်တော့်ကို မြန်မာပြည်မပြန်ဖို့နဲ့ ဆုပေးပွဲတက်ဖို့ပြောတယ်.. အဲဒီအထိတော့ ကျွန်တော် ဒီမှာ မရှိနိုင်ဘူးပြောတော့.. သူက ဘဝင်ကျဟန်မတူဘူး.. ကျွန်တော် မတက်ဖြစ်ရင် ဆုကို တစ်ခြားလူတစ်ယောက်ကို ပြောင်းပေးမယ့် ပုံပဲ.. ဘာကြောင့်ရယ်.. ကျွန်တော် နားမလည် နိုင်ဘူး..
ကျန်ခဲ့တဲ့တစ်ပတ်က ကျောင်းမှာ ကျောင်းသားတွေအတွက် Stress (စိတ်ဖိစီးမှု) ကိုယ်တိုင် လျှော့ချနိုင်မယ့် ပညာပေး ပွဲလေးသဘောမျိုးရှိခဲ့တယ်.. အဓိကကတော့ စာမေးပွဲ၊ လူမှုဆက်ဆံရေး ဘာညာနဲ့ ပတ်သက်လို့ပေါ့.. သူတို့က self-esteem (မြန်မာလိုဆို ကိုယ့်ကိုယ်ကို လေးစား၊ကြည်ညိုမှုလို့ခေါ်မလား) ကို မြှင့်ထားဖို့ပြောတယ်..ဒါပေမယ့် ကျွန်တော့် အမြင်တော့ အဲဒါဟာ အဓိကဖြစ်ပေမယ့် နည်းနည်း ထဲထဲဝင်ဝင်လေး ပိုပြောပြရင်တော့ ကောင်းလိမ့်မယ်ထင်တယ်.. ဘာဖြစ်လို့လဲဆိုတော့ self-esteem ဆိုတာ လူတစ်ယောက်ထဲအတွက် ကိစ္စတစ်ခုနဲ့ တစ်ခုမှာ အနိမ့်အမြင့် မတူနိုင်ဘူးလေ.. ဥပမာ. ကျောင်းစာမှာ ခင်များကိုယ် ခင်များ self-esteem သိပ်မြင့်နေပေမယ့်၊ တစ်ခြားကိစ္စတွေ ဖြစ်တဲ့ အချစ်ရေးတို့၊ မိသားစုနဲ့ ဆက်ဆံရေးတို့မှာ နိမ့်ချင်နိမ့်နေမှာပေါ့။ နောက်ပြီး ကောင်းသော မြင့်ခြင်း၊ မကောင်းသော မြင့်ခြင်းလည်း ရှိအုံးမယ်.. လွန်သွားရင် သူက ဘဝင်မြင့်ရောဂါမျိုး ဖြစ်သွားတတ်တယ်.. အဲဒီ အခါကျရင်လည်း စိတ်ဖိစီးမှု ဖြစ်ရပြန်ရော.. ဥပမာ၊ ကျွန်တော့်လိုပေါ့.. တခါတလေကျ အနာသိ၊ ဆေးရှိပေမယ့်လည်း ကုလို့မတတ်တာ ခက်နေတယ်.. ရုပ်ရှင်တွေလည်း ကြည့်ဖြစ်တယ်.. Ong Bak 2 နဲ့ Ip Man နှစ်ကား.. Ong Bak 2 ကတော့ ထိုင်းကားမလို့ အိမ်နီးချင်းအငွေ့အသက်လေးတွေ မြင်ရတယ်..အပြင်အဆင်နဲ့ သရုပ်ဆောင်တွေလည်း မဆိုးဘူး.. ပြီးခါနီး သိုင်းကွက်တွေ ပြတာတော့ နည်းအီလို့.. အကြိုက်ကြီးတော့ မဟုတ်လှပေမယ့် မွေထိုင်းအကွက်တွေကြောင့် ကြည့်လို့ တန်တဲ့ ကားတစ်ကားပါ.. နောက်တစ်ခု Ip Man ကတော့ တော်တော်လေးစွဲခဲ့တဲ့ကားပါ.. အသံထွက်က အစ်(ပ်)မန် လို့ထွက်တယ်.. တရုတ်စကားပြော အင်္ဂလိပ်စာတန်းထိုး.. ကြော်ငြာအဖြစ် အမြည်းကြည့်ရတုန်းက ဒီလောက်ကြီး မထင်ထားပေမယ့် အများကြီး လုပ်ပြသွားနိုင်ခဲ့တယ်.. ရုပ်ရှင်ဆိုတာ အမျိုးသားရေးတစ်ရပ်လို့မြင်တယ်ဆိုတဲ့ ဒါရိုက်တာ ကြည်စိုးထွန်းရဲ့ ဆိုလိုချက်ကို ဒီကားမှာ ကျွန်တော်တွေ့ခဲ့တယ်..Ip Man ဆိုတာ နာမည်ကြီး သိုင်းအက်ရှင်မင်းသား Bruce Lee ရဲ့ ဆရာပေါ့.. သူ့ရဲ့ ဘဝတစ်စိတ်တစ်ပိုင်းကို ဖော်ရိုက်ထားတာပါ..အထူးသဖြင့် သူ့နယ်ကို ဂျပန်တွေ ဝင်သိမ်းတုန်းက ဂျပန်စစ်တပ်ကို တရုတ်သိုင်း သင်ပေးဖို့ ငြင်းခဲ့သူ..သူ ကစားတဲ့ သိုင်းက Wing Chun လို့ခေါ်တယ်.. အဲဒါကို တီထွင်ခဲ့တာတော့ မိန်ကလေးတစ်ယောက်ပါတဲ့.. အထူးသဖြင့် fisting ထိုးတာလေးတွေ ကျွန်တော် စွဲသွားတယ်.. တကယ့် သိုင်းကားတစ်ကားအနေနဲ့ ဖြစ်သင့်တဲ့ ကားမျိုးပါ..စကားပြော၊ အမူအယာလေးတွေမှာ ရယ်စရာ ဟာသလေးတွေ ညှပ်ထားလို့ ဇာတ်ကားတစ်ကားလုံး လေးမနေဘူး။True story အတိုင်း 100% real ရိုက်ထားတာတော့ မဟုတ်ပါဘူး.. Wikiမှာတော့ သူ ဟောင်ကောင်ကို ထွက်တဲ့အခါမှာ မိသားစုပါမသွားဘူးလို့ ဆိုထားတယ်..ရုပ်ရှင်ထဲမှာတော့ ဒါရိုက်တာက လိုက်သွားခိုင်းတယ်..း) Ong Bak 2 ရော၊ Ip Man ကိုပါ ဒုတိယပိုင်းထက်ထွက်မယ်လို့ သိရပါတယ်..(movieတွေကို ပို့စ်တစ်ခုအနေနဲ့ ရေးချင်ပေမယ့် ကျွန်တော့် အများကြီး မဝေဖန်တတ်လို့)
စာအုပ်တွေ အနေနဲ့တော့ ဒီရက်ပိုင်းမှာ http://yeyintnge.blogspot.com က ဒေါင်းလာတဲ့ ဦးနုရဲ့ တာတေစနေသား ဖတ်ဖြစ်နေတယ်..

Ip Man- Uploaded from Wikipedia

Ong Bak 2- Uploaded from Wikipedia

ခေါင်းစဉ်က ညီမလေးနဲ့

အမြင်ကတ်စရာကောင်းအောင်
ပြောင်းလဲနေတဲ့ ရာသီတွေနဲ့
မြှောက်ထိုးပင့်ကော်
ကြံရာပါ နာရီတွေဆီကနေ
စာသင်ကျောင်းက ညီမလေးကို ပြန်ခေါ်ပေးဖို့
ကာလယန္တရားကို ငါ ပြန်ပေးဆွဲလာခဲ့တယ်..

အချိန်တွေကို စိတ်ကြိုက် ဘက်ဂီယာပေးပြီး
ချောင်းပြင်လို့ တစ်ချက်ဆိုးလိုက်တဲ့အခါ
ကျောင်းအပြင်ဘက်ရှိ ကောင်းကင်တစ်ချပ်မှလည်း
သူမ၏ အိမ်ပြန်ရာလမ်းကို
အချိန်အတန်ကြာ
တိမ်ဆိုင်တစ်ချို့ ဖျော်ချခဲ့ပေးပါ။
(ခပ်ပေါ့ပေါ့ ရုပ်ရှင်တွေထဲလောက်ပဲဖြစ်ဖြစ်
မိတ်ဆက်ခွင့်လေးပေးပေါ့)

ကာရံတွေ သတိစွဲကာ
တီထွင်မှုမဲ့တဲ့ ဖီလင်ထုတွေ
အထူးစီမံထားသော စာဖြူလွှာအားလည်း
အောင်သွယ်တော် လွယ်အိတ်နီနီမှတဆင့်
ရှောင်ဖယ်နေသူထံ အစီအရင်ခံခဲ့ရလိုပါ၏။

"ဒေသနာတော်အရ
သံသရာကို ဆွဲဆန့်မယ့် စကားလေးတစ်ခွန်း
ပြောပြမယ် ညီမလေးရေ..
နင့်ကို ချစ်တယ်"

ခေါင်းလောင်းသံ ခေါ်ဆောင်ရာတလျှောက်
နွေနေပူပူ၊ ဖိနပ်ဖြူဖြူလေးအောက်မှ
ကျောင်းသူလေး နင်းမယ့် လမ်းမှာလည်း
ကျောင်းသားလေး ခင်းမယ့် ပန်းတွေ ပွင့်ရပါလို၏။

အိပ်မက်ဆိုးတို့ရေ...
သင်တို့ထံ လက်နက်နဲ့ ငြိမ်းချမ်းရေးအားလည်း
စာဖြူနဲ့ ချစ်သူအဖြစ် အလင်းဝင်ပါရစေ..

ကမ္ဘာအဝေး မုန်တိုင်းတွေထန်လည်း
အရာရာဟာ ညီမလေးပဲ ဆန်နေလို့
တောင်းဆိုထားတဲ့ အချက်တွေအတိုင်း
လိုက်ရောညီထွေ ပြန်ဆုံချင်တယ်
အို.. အိပ်မောကျနေတဲ့ ရင်တွေတောင်
ပြန်ခုံနေပေါ့....

ကောင်းကင်များ၏ အထ္ထုပ္ပတ္တိ

အမေနေ့တဲ့.. ရိုးရိုးသားသား ဝန်ခံရရင်တော့ ကျွန်တော် တခါမှ မသိခဲ့တဲ့ အမှန်ပဲ.. အမေကျော် ဒွေးတော်လွမ်းပြီး အင်္ဂလိပ်လို Mother's day ကိုပဲ သတိထားမိလေရဲ့.. ဒီနှစ်တော့ ဇန်နဝါရီ ၁၀မှာ ကျရောက်ခဲ့ပါတယ်.. မြန်မာလိုတော့ ပြာလိုလပြည့်နေ့ကို သတ်မှတ်ထားတာပါ..မတိုင်ခင် ၉ရက်နေ့က ကိုရင်ညိန်းနဲ့ chat မှာတွေ့ပြီး.. သူပြောပြလို့သာ သိရတာ.. အမေနေ့အကြောင်း သူ e-book တစ်အုပ် စီစဉ်နေကြောင်း အဆင်ပြေရင် ကဗျာလေးတွေနဲ့ ဝိုင်းပေးဖို့ ပြောပါတယ်.. တိုက်တိုက်ဆိုင်ဆိုင်ပဲ ကျွန်တော်လည်း ပူပူနွေးနွေး ပြီးထားတာလေး တစ်ပုဒ်ရှိတော့ ပို့ပေးဖြစ်တယ်.. အခုတော့ အဲဒီ e-book လေးထွက်လာခဲ့ပါပြီ.. ကျွန်တော် အပါအဝင် ဘလော့ဂါ/ ကဗျာဆရာ၊ ဆရာမတွေ စုစုပေါင်း (၂၁)ယောက်၊ တစ်ယောက်တစ်ပုဒ်နှုန်းစီနဲ့ ပါဝင်ထားပါတယ်.. ကျွန်တော့် ကဗျာလေးကတော့ အမေ့အကြောင်းထက် အဝေးမှာ ဖြစ်ပျက်နေတဲ့ အကြောင်းတွေကို ပြန်ပြောပြထားတဲ့ သားတစ်ယောက်ရဲ့ စာမျိုးလေးပါ.. ကလောင်ကိုတော့ ခန့်နေလို့ တပ်ထားပါတယ်။ ဘာပဲဖြစ်ဖြစ် ကျွန်တော် လေးစားအားကျရတဲ့ နောင်တော် ကဗျာဆရာတွေ.. အထူးသဖြင့် ကိုကောင်းကင်၊ ကိုညိမ်းညိုတို့နဲ့ ဒီလို တစ်အုပ်ထဲ အတူတူပါဝင်ခွင့်ရတာကို ဝမ်းသာမိတယ်ဗျာ..

စီစဉ်သူ နယ်တူသား ကိုရင်ညိန်းကိုလည်း အတိုင်းထက်အလွန်၊ ကျေဇူးမှတ်တမ်းတင်ပါတယ်ခင်မျ..း)

Mother Day Poems2

Publish at Scribd or explore others: Poetry Literature

Download:

ကောင်းကင်များ၏ အထ္ထုပ္ပတ္တိ

မေမေသို့

သို့ မေမေ
နေကောင်းရဲ့လား..
သတိရစွာနဲ့ ကျွန်တော်စာရေးလိုက်ပါတယ်
ကျွန်တော်တော့ နေကောင်းနေတယ်
ရာသီဥတုကတော့ အရင်လို
ပုံမမှန်တာ ပုံမှန်တုန်းပဲ။
ပူလိုက်၊ အေးလိုက်ပေါ့။

အိမ်ထဲမှာ အဲယားကွန်းတွေတပ်ထားပေမယ့်
ထစ်ခနဲရှိ အငွေ့ပျံချင်နေတဲ့ အရည်ပျော်အိပ်မက်တွေကို
ယပ်ခတ်ပေးနေရတာတော့ရှိတယ်။

ဒီမှာတော့
တစ်နှစ်ပြည့်သွားတိုင်း
ဖျက်မရတဲ့ အိုးမည်းတွေနဲ့အတူ
ကျွန်တော်လည်း သိုးမည်းတစ်ကောင် ဖြစ်နေပေါ့။

ဒါနဲ့..
ကျွန်တော် အရင်ကထက်
အရပ်ရော၊ လျှာပါ နည်းနည်းပိုရှည်လာတယ်.. သိလား

ကျွန်တော်ဟာ အေးခဲစွာနဲ့ ပျော်နေသူတစ်ယောက်ဆိုတာ
သူတို့ကို ဘယ်လိုရှင်းပြရမှန်းတောင် မသိဘူး။

မေမေပို့ပေးတဲ့ အပင်တစ်ချို့လည်း
ကျွန်တော် စိုက်ထားတယ်
ဒီမြေမှာ နေဝင်နေထွက် ရိုးသားမှုက လွဲရင်
ကျန်တာ အပေါက် သိပ်မြန်တယ်

ပထမကမ္ဘာမှာက
ကျွန်တော်တို့တွေလို
အချိုမှုန့်ကို ဟင်းခတ်မယ့်အစား
စကားပြောတဲ့အခါနဲ့ အပြုံးတွေထဲကို ပြောင်းခတ်နေကြပြီ။

ပေါပေါများများတွေ့ရတာတော့
ရယ်ဒီမိတ် ပစ္စည်းရယ်၊ ပါးစပ်ပေါက်တွေရယ်ပဲ..
.... ရယ်ဒီမိတ် စရိုက်၊ ရယ်ဒီမိတ် ဒီပလိုမာ
ရယ်ဒီမိတ် ခေါက်ဆွဲခြောက်၊ ရယ်ဒီမိတ် ဆက်ဆံရေး ...
(မပြောကောင်း၊ မဆိုကောင်း
ရယ်ဒီမိတ် ကဗျာတွေ လုပ်ရောင်းရင် ကောင်းမလားတောင် စဉ်းစားမိသေး)

အချိန်တော်တော်များများမှာ
ကိုယ့်ကိုယ်ကို ပြန်ကျပျောက်နေတာ သိပ်ဆိုးတယ် မေမေရယ်
စုန်ချင်တဲ့ စိတ်ကို ဇက်သပ်နေရတာ
လုံးလည်ချာလည်နဲ့..

ကြက်ခြေခတ်ဦးရေ မထူထပ်ခင်
အချိန်မှီ.. မျက်လုံးတွေကို ဘောင်ဆွဲခတ်နေရတာလည်း ပါတယ်။

လူမျှားချိတ်တွေကလည်း
အမျှားခံချင်စရာ ကာလာစုံပဲ
ပြာနန့်နန့်နဲ့ တစ်ခုဟာ ကျွန်တော့် အကြိုက်လေ
ဘာပဲဖြစ်ဖြစ်
ကွန်ပစ်တဲ့အထဲ ပါသွားတာထက်စာရင် တော်သေးတာပေါ့။

ချစ်သူတော့ မရှိသေးပါဘူး
ဒီမျောက်ဟာ အမြီးပဲ မပေါက်နိုင်ဘူးလို့
မေမေ ပြောတော့မယ်မလား
လူအချင်းချင်း ဆွဲဆောင်တဲ့အလုပ်မှာ ကျွန်တော် ညံ့ပေမယ့်
ရုပ်ရှင်ရုံတွေက လက်မှတ်တစ်စောင်ထဲလည်း ပေးဝယ်ပါတယ်ဗျ
တစ်ရေးနိုးတိုင်း
လက်ကလေးတစ်ခုကို ကိုင်ထားချင်တဲ့ ရောဂါကလွဲရင်
အားလုံး အဆင်ပြေပါတယ်။

ကျွန်တော် မှာလိုက်တဲ့စာအုပ်တွေရော ရှာလို့တွေ့ရဲ့လား
မေမေလည်း ပျော်အောင်နေနော်..

အဝေးက သား
edu

ကြိုးတပ်ထားသော ပန်လိုစိတ်

"မနက်ဖြန်" အား
"ဒီနေ့" အဖြစ်
အမည်ပြောင်း ကင်ပွန်းတပ်ပွဲတွေနဲ့အတူ
သစ်ပင်တွေ
အလိုက်အထိုက် ဆံပင်ရှည်လာကြတယ်..
(ငါ့ စိတ်တွေ မဟုတ်လို့နဲ့ ထင်တယ်)

သောင်းကျန်းနေတဲ့ စွဲလမ်းစိတ်တွေဟာ
လှည်းနေ လှေအောင်း
မြင်းဇောင်းမကျန်ကို
ချဉ်းနင်း ဝင်ရောက်နေကြလို့..
ဒီအချိန်မှ မျဉ်းကြားခင်းလည်း
ဒီသူရဲကောင်းမှာ
ဖြတ်ကူးစရာ ခြေထောက်မှ မကျန်တော့တာ။

အလွတ်ကျက်ထားတဲ့ နင့်ရဲ့ကောက်ကြောင်းတွေ
ချရေးလိုက်တဲ့ နေ့ကများ
ငါ တစ်ယောက်ထဲ လူကျွံနေခဲ့သလား...
မသေချာဘူး။

ချုပ်ရိုးတွေ မကျပ်ခင်
အဲဒီ နေဝင်မယ့်လမ်းကို
နေရာဖယ်ပေးခဲ့တာကိုက
ငါတို့ မှားတယ်။

နောက်ထပ်..
နာရီတွေကို လည်ဖို့
အချိန်ထပ်ပေးခဲ့တာလည်း
ငါတို့ မှားတယ်
ဆက်ပြီး မှားတယ်...
ဆက်ပြီး မှားတယ်...
တောင်းတဲ့ဆုဆိုတာ
အခွန်မဲ့တိုင်း မချဲ့ကောင်းဘူး..

နွေရောက်တော့မှာမို့
ရေတစ်ပေါက်လောက်ကို
သေမလောက်အောင် လိုနေသူဆိုတာ
စကားလုံးတိုင်းရဲ့
အကြောအချဉ်၊
အရိုးအမျှင် တစ်ခုချင်းစီမှာ
ခွဲ-စိတ်-ဖြတ်တောက် အဖြေရှာကြည့်လို့ရတယ်။

ဘာပဲဖြစ်ဖြစ်
လွတ်လွတ်ကျွတ်ကျွတ် ဆွဲပြေးခွင့်လေးတစ်ခု
အစပြုလို့
(၁) ရေပူရေချမ်း ကမ်းလှမ်းခွင့်
(၂) ငါ တစ်ထမ်း၊ နင် တစ်ရွက်ခွင့်
(၃) အာရုံ ငါးကြိုးမှာ
တစ်ယောက်နဲ့ တစ်ယောက်
လူဆန်ဆန်လေး ချည်ပေးခွင့်တွေလောက်
ရည်ရွယ် ဖြစ်မိတယ်။

" နှံကောင်မလေးရေ..
......အစာနဲ့ ရေတွေ စုဆောင်းလို့
......ဒီမိုးတွေကို
......တို့နှစ်ယောက်အတူ ဖြတ်သန်းကြမယ်လေ

ဒီမှာ..
ကြွပ်ဆတ်ဆတ်နဲ့
ကျောက်ခေတ်ရင်ခွင်ကြီးတစ်ခုက
အရေးပေါ် အခြေအနေထိတိုင်အောင်
ယဉ်ကျေးနေတုန်းပါပဲ "

Diary 01.01.09

ဇန်နဝါရီ (၁)ရောက်တိုင်း
နှစ်ဟောင်းတွေဟာ
အင်္ကျီအသစ်ကို ကောက်စွပ်ကြ
မဝတ်ချင်လည်း ဝတ်
ဝတ်ချင်လည်း ဝတ်..
ခန္ဓာအဟောင်းနဲ့ နှစ်သစ်တွေ။

လူတွေက မျက်နှာတွေ
ကောက်သစ်ကြ
မသစ်ချင်လည်း သစ်၊
သစ်ချင်လည်း သစ်
မျက်နှာအဟောင်းနဲ့
လူ __ တွေ။

နှလုံးသားတွေကို
နှလုံးသားတွေနဲ့ ဖာထေး..
နှစ်သစ်မှာ
နားလည်မှုတွေ လျှော့ဈေးရနေ..
ငြိမ်းချမ်းရေး (၁)ခုယူရင်
(၂)ခု အလကား ပေး....

ကမ္ဘာသစ်မှာ
ဗမာဖြစ် ကဗျာအစစ်တွေရော
ပါရဲ့လား ?

မိသားစု

အခုတလောမှတင် မဟုတ်ဘူး.. ကျွန်တော် ရှေ့အကြောင်း စဉ်းစားမိနေတာ ခဏခဏပဲ..
အနီးကပ်ဆုံးက ကျောင်းပြီးသွားရင် ဘာလုပ်မလဲ၊ ဘာဖြစ်မလဲပေါ့.. ပုံမှန်လို အလုပ်ရ၊ Perment Resident ယူပြီးသွားမလား.. ဒါမှမဟုတ် အမှတ်မှီပြီး တက္ကသိုလ်ဆက်တက်မလား.. တစ်ခါတစ်လေလည်း ကျောင်းပြီးသွားရင် မြန်မာပြည်ပြန်ဖို့အတွက် ကျွန်တော် စဉ်းစားမိတယ်... ဒီမှာ မပျော်ဘူးဆိုတာထက် ငြီးငွေ့လာတယ်.. သူတို့သတ်မှတ်ချက်ထားတဲ့ စံချိန်၊ စံညွှန်းတွေကို ကျွန်တော် မကိုက်ညီချင်ဘူး.. ကိုယ့်ကိုယ်ကို ရင့်ကျက်ချင်ယောင်ဆောင်နေရတာ.. ကိုယ့်ကိုယ်ကို ပြန်ဖွက်နေရတာနဲ့တင်.. နောက်ဆုံး ကိုယ်ဘယ်နားမှာ ကျကျန်ခဲ့မှန်းတောင် မသိတော့ဘူး.. အားလုံးဟာ ကျွန်တော် ထင်ထားသလို လေးနက်မှုတွေမရှိဘူး.. ကျွန်တော်တစ်ယောက်ထဲရဲ့ စိတ်ကပဲ ပုံမှန် အရောင် ရှိမနေတာ ဖြစ်ချင်ဖြစ်မှာပေါ့လေ...

လမ်းအိုလေးကနေ ဒေါင်းထားတဲ့ ကဗျာတွေ တစ်ချို့ပြန်ဖတ်နေမိတယ်.. အဲဒီအထဲမှာ ဆရာစိုင်းဝင်းမြင့်ရဲ့ မိသားစုကဗျာလေးက အခုတလော ကျွန်တော် ဖြစ်နေတဲ့ စိတ်တွေနဲ့ တိုက်ဆိုင်နေလို့လားတော့မသိဘူး.. ကျွန်တော့် စိတ်ထဲ တော်တော်လေး စွဲနေတယ်.. အထူးသဖြင့် ကဗျာအဦးက စာကြောင်းတစ်ချို့ပေါ့..

မိသားစု

မိသားစုဆိုတာ
တစ်ယောက်ရှေ့ရောက်ဖို့
တစ်ယောက်နောက်ဆုတ်ရတယ်
သစ်ကိုင်းတစ်ကိုင်း တိုးထွက်ဖို့
သစ်ကိုင်းတစ်ကိုင်း အခုတ်ခံရတယ်
မိသားစုသီချင်းဟာ အတက်အဆင်းရှိတယ်
သံစုံမြည်တယ်။

မိသားစုဆိုတာ
လူခြောက်ယောက်ရှိ လူခြောက်ယောက်
လက်ဆယ်ချောင်းရှိ လက်ဆယ်ချောင်း
ခေတ်ကတောင်းဆိုတဲ့အတိုင်း လှုပ်ရှားရတယ်
အိမ်ရှိ လူအကုန်။

မိသားစုဆိုတာ
ရှင်သန်ဖို့အတွက် အဆက်မပြတ် တိုက်ပွဲဝင်ရတယ်
ရန်ကုန်ဟာ စစ်မြေပြင်

လဲကျသွားတဲ့ ငါ့အဖေနေရာကို
ငါ့ညီလေးဝင်ခဲ့တယ်
ယိုင်နဲ့သွားတဲ့ ငါ့အမေနေရာကို
ငါ့ညီမလေးဝင်ခဲ့တယ်
မိသားစုကို ငါမပြင်ခဲ့ဘူး။

ငါ့အတွေးအခေါ်
သားသမီးဆိုတာ သီးခြားရှင်သန်ရမယ့် ဘဝတစ်ခု

ငါဟာ လမ်းပေါ်မှာ ကြီးပြင်းခဲ့လို့
လမ်းနဲ့ သွေးသားတော်စပ်တယ်လို့ ထင်တယ်
ငါ့မိသားစုမှာ ငါဟာ မလင်းတဲ့မီး
ငါ့မိသားစုမှာ ငါဟာ မလုံခြုံတဲ့ထရံ
ငါ့ကြိုးကို တီးခတ်လိုက်တိုင်း သံကြောင်ထွက်တယ်
ငါ့မိသားစုမှာ မိုးယိုပေါက်လေးတစ်ပေါက် ရှိနေတယ်ဆိုရင်လည်း
ငါပဲဖြစ်မှာပါ။

ငါ့မိသားစုမှာ
ကြမ်းခင်တစ်ချပ် ကျိုးပဲ့နေတယ်ဆိုလည်း
ငါပဲဖြစ်မှာ
မအောင်မြင်တဲ့ ဘောလုံးအသင်းဟာ ငါ့မိသားစုပဲ
မဝင်တဲ့ဂိုးတွေကို ငါသွင်းခဲ့တာ။

စိုင်းဝင်းမြင့်
[ရွှေမော်ကွန်း - ဇန်နဝါရီ၊ ၂၀၀၃]

စာမျက်နှာပါအရဆို ၂၀၀၃ ဇန်နဝါရီက ရွှေမော်ကွန်းမှာ ဖော်ပြခဲ့တဲ့ ကဗျာလေးပေါ့..
အခုနောက်ပိုင်း ဆရာ့ရေးဟန်တွေက အဲဒီတုန်းကနဲ့တော့ မတူတော့ပါဘူး..
အထူးသဖြင့် နောက်ဆုံးထွက်ထားတဲ့ "များများမြန်မြန်" ကဗျာစာအုပ်မှာ တွေ့နိုင်ပါတယ်..

ဟိုရောက် ဒီရောက် ဒီဇင်ဘာ ၂၇ ဒိုင်ယာရီ

Dဇင်ဘာ.. ဒီဇင်ဘာဟာ ကျွန်တော့်အတွက်တော့ ဘာမှထူးထူးခြားခြား မရှိခဲ့ပါဘူး..
နှစ်တိုင်းလိုလိုပဲပေါ့။ Stage ကျောင်းတုန်းကတော့ အားကစားပွဲတွေနဲ့ လူထုလမ်းလျှောက်ပွဲတွေ ရှိလို့ ပျော်ခဲ့ဖူးတယ်.. ခရစ်စမတ်မှာ ကျောင်းပိတ်ရက် (၁)ပတ်လောက် ရတယ်လေ..
New Year ကိုတော့ နှစ်တိုင်းလိုလို မကျင်းပဖြစ်တာ များတယ်။ မြန်မာပြည်မှာတုန်းက အိမ်အနီးအနားမှာ မီးပုံပွဲတွေ လုပ်ဖြစ်ကြပေမယ့် ကျွန်တော့် အိမ်က ပုံမှန်အချိန်အတိုင်းပဲ တံခါးပိတ်တာကြောင့် (၁၂)နာရီအထိမနေရခင် ပြန်အိပ်ရပြီ... တခြားအိမ်မှာ အိပ်တဲ့အကျင့်လည်း အဲဒီတုန်းက မရှိခဲ့ဘူးလေ..
အခု စလုံးရောက်တော့တော့ ပြီးခဲ့တဲ့နှစ်က Singapore poly က သူငယ်ချင်းတွေနဲ့ အတူတူရှိနေခဲ့တယ်..
တစ်ယောက်နဲ့ တစ်ယောက် စရင်း နောက်ရင်း ပုံပြင်တွေပြောပြလိုက်၊ ကစားနည်းတွေ ကစားလိုက်နဲ့ မိုးလင်းပေါက် west coast မှာ ထိုင်ခဲ့ကြတယ်.. အခုနှစ်တော့ ဘာတွေ လုပ်ဖြစ်မလဲ မသိသေးဘူး...

လောလောဆယ် ကျောင်းပိတ်ရက်အတွင်းတော့ ကျွန်တော်လုပ်ချင်တာလေးတွေ လုပ်နေရလို့ လုပ်သင့်တာတွေတောင် မလုပ် ဖြစ်လိုက်ဘူး။ စာပေနဲ့ ပတ်သတ်ပြီး ကျွန်တော် ပိုလေ့လာဖြစ်တယ်။ စိတ်ဝင်စားတဲ့ မော်ဒန်စာပေအပိုင်းပေါ့။ ပြည်ပမှာဆိုတော့ စာအုပ်တွေက ရန်ကုန်မှာလောက်တော့ ရှာရမလွယ်ဘူး။ ဒါတောင် e-books တွေ လုပ်ပေးထားတာရှိနေလို့၊ လက်လှမ်းမှီသလောက် ကြည့်နိုင်တာ..
တလောက ကိုညိမ်းညိုကျေးဇူးကြောင့် ဆရာဇော်ဇော်အောင်နဲ့ ဆရာတာရာမင်းဝေရဲ့ စာအုပ်နှစ်အုပ်ရခဲ့တယ်။ e-books တွေ ဆိုတော့ Print out ပြန်လုပ်ရတာတော့ ရှိတယ်။ ကွန်ပြူတာနဲ့ဆို ကျွန်တော်လည်း ဘယ်လိုမှ ဖတ်မရလို့။ နောက်တော့ သူငယ်ချင်း နတ်ကလေး အိမ်ရောက်ရင်း.. သူနဲ့ မော်ဒန်အကြောင်း တော်တော် ပြောဖြစ်လိုက်တာ.. မနက်(၄)နာရီလောက် အထိ ဖြစ်သွားတယ်.. ကျွန်တော် ဖတ်ဖူး၊ မှတ်ဖူးထားတာလေးတွေနဲ့ သူ့ရဲ့ အမြင်လေးတွေ ဖလှယ်ဖြစ်တယ်.. မော်ဒန်ကို ကျွန်တော်တို့တွေ အရမ်းကြီး နားလည်နေလို့တော့ မဟုတ်ပါဘူး.. တကယ်ကြည့်မယ်ဆိုရင် အပေါ်ယံသက်သက်ပဲ ဖြစ်ကောင်းဖြစ်မယ်.. ကြားဖူးနာဝလေးတွေပေါ့.. ဒါပေမယ့် အဲဒီလို ပြောဆို ဆွေးနွေးရတာလေးကို ကျေနပ်မိတယ်.. (အနုပညာနဲ့ ပတ်သတ်လို့ ကျွန်တော့်မှာ သူငယ်ချင်းသိပ်မရှိပါဘူး) နတ်ကတော့ သူလုပ်ဖြစ်နေတဲ့ ခဲချစ်ပန်းချီ အကြောင်းတွေနဲ့ ဆက်စပ်ပြီး ပြောတယ်.. အနုပညာဟာ တစ်ခုနဲ့ တစ်ခု ထိစပ်နေတယ်ဆိုတာကို ကျွန်တော်တို့ ပိုပြီးသဘောပေါက်လာကြတယ်..

အခုနောက်ပိုင်း ကျွန်တော့် ကဗျာတွေကတော့ (အရင်ကလို အလွတ်ကာရံသဘောထက်စာရင်) မော်ဒန်ပုံစံတွေ ဖြစ်ဖို့များမယ်ထင်တယ်.. ကျွန်တော် တမင်ဖန်တီးယူပစ်လိုက်တာတော့ မဟုတ်ပါဘူး။
ကျွန်တော့် စိတ်၊ ကျွန်တော့် mood ပေါ့.. လောလောဆယ် မော်ဒန်စာပေမှာ သက်ဝင်နေလို့..
အတိုင်းအတာတစ်ခုအထိ ကျွန်တော် အရေးကျဲကောင်းလည်း ကျဲသွားနိုင်တယ်..
တချို့ သဘောတရား၊ အယူအဆ၊ ရေးပုံရေးနည်း စနစ်တွေနဲ့ ပတ်သတ်လို့ ကျွန်တော် နားမလည်တာ၊ သဘောမပေါက်တာတွေ အများကြီးရှိနေလို့.. ရတဲ့ အချိန်လေးတွေဖဲ့ပြီး စာအုပ်တွေဖက်လှည့်ချင်တယ်.. တစ်ခါတစ်လေလည်း အကြောင်းအရာ အပြောင်းအလဲအနေနဲ့ ဆရာကြီး ဒေါက်တာသန်းထွန်းရဲ့ သမိုင်းစာအုပ်တွေ ဖတ်ဖြစ်တယ်.. ဆရာကြီးရဲ့ စာတွေကို အရင်က မဖတ်ဖူးပါဘူး။ အခုလက်ရှိတော့ "မြန်မာပြည်အုပ်ချုပ်ရေး" ဆိုတဲ့ စာအုပ်လေး ဖတ်ဖြစ်နေတယ်.. ဆရာကြီးရဲ့ စာတွေထဲမှာ သူ့ရဲ့ တိတိကျကျလေ့လာထားမှုကို စာအရေးအသားမှာ ကြည့်ရင် သိနိုင်ပါတယ်.. ဖတ်တဲ့သူကိုလည်း ရှင်းအောင်၊ နားလည်လွယ်အောင် ရေးပြတတ်တယ်..

ဒါတွေကတော့ ၂၀၀၈ ဒီဇင်ဘာထဲ ကျွန်တော် လုပ်ဖြစ်နေတဲ့ အရာတွေပေါ့.. တချို့ရက်တွေမှာ ရန်ကုန်ကနေ အလည်ရောက်လာတဲ့ သူငယ်ချင်းတွေနဲ့အတူ စလုံးမြေတစ်လျှောက် လျှောက်သွားဖြစ်တယ်။ ခရစ်စမတ်ရက်ကတော့ ကျောင်းက သူငယ်ချင်းတစ်ချို့နဲ့ နည်းနည်းသောက်လိုက်တာ.. ဗိုက်က ဘယ်လို ဖြစ်သွားတယ် မသိဘူး.. (၂)ရက်လောက် နေလို့ မကောင်းတော့ဘူး။ ညီလေး ကိစ္စတွေတော့ အားလုံးအဆင်ပြေပြီး ကျောင်းတက်ဖို့ပဲ ကျန်တော့တယ်။ အဖွားလည်း ဆေးရုံက ဆင်းလို့ ရပြီး အဒေါ့်အိမ်မှာ နားနေတယ်။ လမ်းလျှောက်နိုင်ပေမဲ့ ကြာကြာထိုင်လို့တော့ မရဘူးပြောတယ်.. ဘာပဲဖြစ်ဖြစ် အသက်အရွယ်အရ အရမ်း အဆိုးကြီးဖြစ်မသွားတာလို့ တော်သေးတယ်။

အင်း.. ဒါနဲ့ ခင်များတို့ရော နယူးကလီးယား.. အဲလေ.. new year မှာ ဘာတွေလုပ်ဖြစ်မလဲဗျ။
ထူးထူးခြားခြား အစီအစဉ်လေးတွေရှိရင် ရှယ်ခဲ့ပေါ့။ ကျွန်တော်တော့ new year ရယ်၊ အိပ်မက်ရယ်ကို (၁၂)နာရီတိတိ၊ အိမ်မှာ ဆုံဖို့ ချိန်းလိုက်ပြီ..။

အားလုံးပဲ ပျော်ရွှင်သော နှစ်သစ်မင်္ဂလာဖြစ်ပါစေ ခင်မျာ..း)

Myanmar Blog Academy by mmblogpress

တစ်နေ့က ကိုညီလင်းဆက်ရဲ့ ဘလော့ဂ်ကနေ သတင်းထူးတစ်ပုဒ် တွေ့ခဲ့ရတယ်..
အဲဒါကတော့ မြန်မာ Blog Academy ပေးပွဲဖြစ်ပါတယ်.. မြန်မာဘလော့ဂ်တွေထဲကနေပြီးတော့ အမျိုးအစားလိုက် အကောင်းဆုံးတွေကို စည်းမျဉ်းတွေနဲ့ အညီ ရွေးချယ်မယ့် အစီအစဉ်လေးပါ.. သတင်းလေးကို ဖတ်ပြီး စီစဉ်နိုင်သူတွေကို လေးစားမိတယ်.. ကျွန်တော်လည်း အဲဒီလို idea လေးတွေ အရင်က (စိတ်ကူးယဉ်သက်သက်) ဖြစ်ခဲ့ဖူးတယ်..
ချီးမြင့်မယ့်ဆုအမျိုးအစားတွေကတော့ ..

• အကောင်းဆုံး ဘလော့ဂ်ဆု ( ကဗျာ )
• အကောင်းဆုံး ဘလော့ဂ်ဆု ( နည်းပညာ )
• အကောင်းဆုံး ဘလော့ဂ်ဆု ( ပညာရေး )
• အကောင်းဆုံး ဘလော့ဂ်ဆု ( ဘာသာရေး )
• အကောင်းဆုံး ဘလော့ဂ်ဆု ( ရသ စာပေ )
• အကောင်းဆုံး ဘလော့ဂ်ဆု ( သတင်း )
• အကောင်းဆုံး ဘလော့ဂ်ဆု ( အစုအဖွဲ့ )
• အကောင်းဆုံး ဘလော့ဂ်ဆု ( မြန်မာစာပေ )
• အကောင်းဆုံး ဘလော့ဂ်ဆု ( နိုင်ငံရေး )
• အကောင်းဆုံး ဘလော့ဂ်ဆု ( ပရဟိတ )

သတ္တမနည်းပညာ ရပ်ဝန်း (Technical 7) ရဲ့ ကြိုးပမ်းမှုပါ။ အသေးစိတ်အချက်အလက်နဲ့ မဲ(vote) ထည့်သွင်း ပါဝင်ချင်တယ်ဆိုရင်တော့ ဒီနေရာမှာ သွားရောက်လေ့လာနိုင်ပါတယ် ခင်မျာ.. Results တွေကိုတော့ ၂၀၀၉ခုနှစ်၊ ဇန်နဝါရီလ (၁၁)ရက်နေ့ မြန်မာစံတော်ချိန် နေ့လည် (၁၂း ၀၀) တိတိမှာ ဖွင့်လှစ်ကြေညာမှာ ဖြစ်ပါတယ်.. ကျွန်တော်တော့ ရုံကြီးကားတွေ သိပ်မရိုက်ဖြစ်တာကြောင့် မပါဖြစ်တော့ဘူး.. :P ဆုရမယ့် သူတွေကိုယ်စားတော့ တင်ကြို ရင်ခုံမိနေတယ်..း)

ခေါင်းစဉ်မရှိ စောင့်စားခြင်း

ခေါင်းစဉ်မရှိ စောင့်စားခြင်း

ဒါနဲ့ပဲ
သာမာန်လူနဲ့ မတူအောင် ကြိုးစားချင်နေတဲ့
ခင်များရဲ့ စိတ်ကိုက
သာမာန်လူတစ်ယောက်နဲ့ တူနေတာ
မဟုတ်ဘူးလား...

မနက်ဖြန်ထဲမှာ ဘာတွေ ရှိမလဲ ကြည့်လိုက်တော့
ရုပ်နဲ့ နာမ်တွေက
ခင်များကို စောင့်နေကြတယ်..
မပြုရသေးတဲ့ အိမ်ထောင်နဲ့ သားသမီးတွေ
ခင်များကို စောင့်နေကြတယ်..

လေပြေတွေက
ခင်များကို ဝင်တိုက်ဖို့ စောင့်နေတယ်
(ယာဉ်တစ်ချို့လည်း ပါကောင်းပါမှာပေါ့)

နောက်ဆုံးပိတ် ဝင်အိပ်ရမယ့်
အလုံပိတ် ခုတင်တစ်လုံးကလည်း စောင့်နေတယ်

အတက်လား၊ အဆင်းလား.. တဲ့
လှေကားထစ်တွေက
ခင်များရဲ့ ခြေလှမ်းကို စောင့်နေတယ်

ကွက်လပ်တွေက ခင်များကို စောင့်နေတယ်
(မဖြည့်နိုင်ကြောင်း မေတ္တာရပ်ခံချက်ကိုလည်း
ဖြစ်ကောင်းဖြစ်မှာပေါ့)
သူတို့ အထဲမှာတော့
ပါရာဒိုကားပေါ်က မှုတ်ထုတ်လိုက်တဲ့ မီးခိုးတွေ၊
စင်ပေါ် စင်အောက် ခွဲခြားမှုတွေ၊
ခန္ဓာကိုယ် အရှေ့မြောက်ဘက်ခြမ်းထဲက အရာတွေ..
ရှိနေတယ်ဆိုတာ
ဖွင့်မကြည့်ဘဲလည်း ခင်များ သိနေတာပဲ..

မရပ်သေးတဲ့ ရင်ခုံသံနဲ့
နာရီတွေလည်း ပါမယ်..

အမောပြေနေတဲ့ စစ်ပွဲတွေက
ဒုတိယပိုင်း ဆက်ကစားဖို့ စောင့်နေတယ်..

ဒါကိုတော့ ခင်များ ဘဝင်ကျဟန် ပုံမပေါ်ဘူး..

နောက်ပြီး
အဖြေရှာတိုင်း မေးခွန်းတွေပဲ တွေ့နေတာ
ဘောင်ခတ်ထားတဲ့ အကြည့်တွေရဲ့ နယ်နိမိတ်ကနေ
မဆိုသလောက်ကလေး အပြင်ထွက်နေတာ..
စာအုပ်တွေနဲ့ လေ့ကျင့်ခန်းဆင်းနေတဲ့
ဦးနှောက်တွေက မူမမှန်ဘဲ ဖွံ့ဖြိုးနေတာ..
.. တွေအတွက်တော့
ရှင်းလင်းချက်ဆိုတာ မတောင်းကောင်းပါဘူး။

အဖြေဘာထွက်သလဲ မေးလာရင်
အနီးစပ်ဆုံးက "သုည"ပဲလို့ ဖြေမိမှာ..

လူတစ်ချို့က
ငရဲကို အဆီထုတ်ပြီး
မီးအပူတိုက်ထားတဲ့ အနံလေးကိုတောင်
မခံနိုင်ကြပါဘူးတဲ့..

လောလောဆယ်တော့
ကဗျာတစ်ပုဒ်က
ခင်များကို ပြီးအောင်ဖတ်ဖို့ စောင့်နေတယ်။

Diary 18.12.08

ဒီရက်ပိုင်း ညီလေး ကျောင်းလာတက်ဖို့ ရောက်လာလို့ သူ့ကိစ္စတွေ လုပ်ပေးနေရတယ်..
အရင်လို ကွန်ပြူတာကို ကျွန်တော် တစ်ယောက်ထဲ သုံးလို့ မရတော့ဘူး.. ကျောင်းပိတ်ရက်ပေမယ့် project တစ်ချို့နဲ့ လူမှုရေးကိစ္စတွေကြောင့် အလုပ်လည်းမဝင်ဖြစ်သေးဘူး။ ညီလေးပြောလို့ ပြည်မှာ အင်တာနက်ဆိုင်တွေ (၁၀)ဆိုင်လောက် တိုးလာတာ သိရတယ်.. ဒီကောင်ကတော့ လောလောဆယ် full-time chatter ဖြစ်နေတယ်.. ADSL connection နဲ့ member ဝင်လို့ရကြောင်း၊ အင်တာနက်ကို ၂၀၀၀ကျပ်နဲ့ အပြီးသင်ပေးကြောင်းပြောတယ်.. ဘာတွေ သင်ပေးတာလဲလို့ မေးတော့ gtalk account တစ်ခုရယ်၊ website ဝင်တာရယ်၊ ဘယ်လို chat ရတယ်ဆိုတာ သင်ပေးတယ်တဲ့.. တစ်နာရီကို ၁၀၀၀လောက်တော့ ပေးရတယ်.. ကျွန်တော်နောက်ဆုံးပြန်တုန်းပေါ့.. နှစ်ဆိုင်လားပဲ ရှိသေးတယ်.. ဒါပေမယ့် ကော်နက် မဆိုးဘူး.. Blogspot တောင် ဝင်လို့ရလို့ အံ့သြနေတယ်.. ကျွန်တော်ထင်တာ MPT (ဆက်သွယ်ရေး) လိုင်းက ယူထားလို့ ဖြစ်မယ်..
အခုလိုဖြစ်လာတော့ အထက်တန်းတုန်းက သူငယ်ချင်းတွေနဲ့ အဆက်အသွယ်ပြန်ရတယ်.. ဒါပေမယ့် မသိတဲ့ သူတွေလည်း လာ add ကြတယ်.. ကျွန်တော့် Full nameကို ယူသုံးထားတဲ့ accounts တစ်ချို့လည်း တွေ့ရတယ်.. ဘာပဲဖြစ်ဖြစ်မကောင်းဘူးပေါ့.. ကျွန်တော်က ပြောင်းပေးဖို့ပြောတော့.. Block လုပ်လိုက်လားတော့ မသိဘူး.. နောက်မတွေ့ရတော့ဘူး... အဖွားကတော့ ချော်လဲကျလို့ ဆေးရုံတက်နေရတယ်တဲ့... အရိုးပြားသွားပြီး လမ်းမလျှောက်နိုင်သေးဘူး ပြောတယ်...

အစကတော့ နောက်နှစ် final year projectကို တခြားနိုင်ငံတစ်ခုမှာ သွားလုပ်မလို့.. အခုတော့ ညီလေးရောက်လာတာနဲ့ မသွားဖြစ်လောက်တော့ဘူး.. အဖေ့ကို ဖုန်းထဲမှာ စရင်းနဲ့ တရုတ်ပြည်သွားရင် ကောင်းမလားမေးတော့ ကျွန်တော့်ကို ခနဲ့တဲ့တဲ့နဲ့.. ငြင်းတော့ မငြင်းရှာဘူး..း) ကိုလေးကြီးရဲ့ BOB သီချင်းတွေလည်း ဒီရက်ပိုင်း ကျွန်တော့်ကို ငွေ့ငွေ့လေး ပြန်လောင်နေတယ်.. (အချိန်ရရင်တော့ reviewလေးလည်း ရေးချင်သေးတယ်)
ပြက္ခဒိန်ပေါ် နံပါတ်တွေကို ထုတ်ရေရင်းက.. စိတ်တွေလည်း တရုတ်ပြည်ရဲ့ ခြေရင်းက ခွာနိုင်ပါ့မလား...

ထိုင်ခုံများကို ဆက်ထားခြင်း

ထိုင်ခုံများကို ဆက်ထားခြင်း

ထိုင်ခုံများသည် ဒြပ်ရှိပြီး၊ သက်မဲ့သောပစ္စည်များ ဖြစ်ကြသည်။

ရုပ်ရှင်ရုံရောက်တိုင်း အောင်လင်း အမြင်ကတ်လေ့ရှိသည့် ထိုင်ခုံများ ရှိသည်။

မောင်မြင့်၏ လက်သုပ်ဆိုင်တွင် ထိုင်ခုံတစ်ချို့မှာ လက်ရာနှင့်အတူ ဟောင်းလျက်ရှိသည်။

လူအမျိုးမျိုး၊ ထိုင်ခုံအထွေထွေ။

ထိုင်ခုံအမျိုးအားကို ကြည့်၍ လူတစ်ဦး၏ အဆင့်အတန်းကို ခွဲခြားနိုင်ပါသလား။

အင်္ဂလိပ်စာ၏ chairman ဆိုသော အသုံးအနှုန်းကို တိုက်ရိုက်ဘာသာပြန်လျှင် ထိုင်ခုံလူကြီးဟု အဓိပ္ပါယ်ရလေသည်။

ထိုင်ခုံတို့ကို လူသတ္တဝါများက ၎င်းတို့ကိုယ်တိုင် အသုံးပြုရန်အတွက် ထီထွင်ခဲ့ခြင်းဖြစ်လေသည်။ သစ်ပင်များသည်လည်း လူတို့အတွက် ကျောက်ခေတ်မှသည် ယနေ့အထိ မူလလက်ဟောင်း အကျိုးပြု ထိုင်ခုံများ ဖြစ်ခဲ့ကြသည်။ ရုပ်ရှင်ရုံတွင် အောင်လင်း ကြည့်မရသော ထိုင်ခုံများမှာ couple seats ဟု ခေါ်သည့် အတွဲထိုင်ခုံများ ဖြစ်သည်။ အဆင့်အတန်းကို ထိုင်ခုံပေါ်ကြည့်၍ ခွဲခြားမည်ဆိုလျှင် လောကကြီးက သင့်ကို ဝါးလုံးခေါင်းထဲ ဟန်ပါပါပြုံးပြနေသည့် အဆင့်အတန်းတစ်ခုကို လက်ဆောင်ပေးလိမ့်မည်။ ဆိုင်တွင် လက်သုပ်လာစားသော ကျောင်းသူလေးများ ခုံပြောင်းထိုင်ကြသည်ကိုမြင်တိုင်း မောင်မြင့်သည် သူ ငယ်စဉ်က စာသင်ခန်းထဲတွင် ထိုင်လေ့ရှိသည့် တင်ပါးညပ်သော ခုံကလေးကို သတိရမိ၏။

ကမ္ဘာကျော် ဘီလျံနာကြီးမှသည် ပညာရှင်၊ ကုန်သည်ပွဲစား အလယ် ခေါင်းထိုးရွက်ဖျင်ဈေးသည်နှင့် သူဖုန်းစားအဆုံး ထိုင်ခုံတစ်လုံးကိုတော့ ထိုင်ခဲ့ဖူးကြသည်။ အနော်ရထာထိုင်သော ထိုင်ခုံကို ပလ္လင်ဟု ခေါ်တွင်၍ ကျွန်တော်ထိုင်သော ခုံကိုမူ ကုလားထိုင်ဟု ခွဲခြား ခေါ်ခံခြင်းအတွက် ကျွန်တော် ဝမ်းမနည်းဖူးပါ။ ထိုင်ခုံများပေါ်ပေါက်ရာသမိုင်းတွင် ကျောက်တုံးများသည် ပထမဆုံး ထိုင်ခုံလုပ်နည်း အတွေးကို ပေးခဲ့ဟန် ရှိသည်။ အောင်လင်း မုန်းသော couple seatsများမှာ သူ မနှစ်မြို့သလောက် သူ့ဘဝတွင် အထိုင်ချင်ဆုံးနှင့် တစ်ခါမှ မထိုင်ဖူးသေးသော ထိုင်ခုံအမျိုးအစားတစ်ခုဆိုလျှင်လည်း မမှားပေ။ ထိုရည်မှန်းချက်၏ အကောင်အထည်အဖြစ် တစ်လတိတိ အချိန်ယူရေးလျက်ရှိသော မယ်လေးခင်ကို ပေးဖတ်မည့် ရည်းစားစာတစ်စောင် ဒိုင်ယာရီထဲတွင် ခေါက်လျက် ရှိနေပြီဖြစ်သည်။ ဆရာဝန်မလေး မသန္တာသည် သူ့မ၏ ဆေးခန်းရှိ လူနာစောင့် ခုံတန်းရှည်လေးကို ပြန်ပြင်ရန် ဈေးသွားခါနီး အဒေါ်အား လိုအပ်သည့် ပစ္စည်းများ (သို့မဟုတ်) လိုအပ်သည်များ မှာကြားနေ၏။

သမိုင်းဦးခေတ် မူလအသုံးပြုရာ ကျောက်တုံးများမှစ၍ သံ၊ သစ်သား၊ ပလတ်စတစ်၊ ဝါး၊ ကြိမ်၊ ဆိုဖာ၊ သားရေများအထိ ထိုင်ခုံတစ်လုံး၏ ဖွဲ့စည်းရာ၌ အဓိကပစ္စည်းများအဖြစ် ပါဝင်လာခဲ့ကြသည်။ နည်းပညာသစ်များဖြင့် ပေါင်းစပ်ကာ နတ်တို့ မလိုက်နိုင်သော လူ့အလိုကို လူအချင်းချင်းလိုက်ရန် ကြိုးစားနေကြသည်။ အောင်လင်းသည်လည်း သူ၏ ရည်းစားစာ project သို့ သူငယ်ချင်း ကဗျာဆရာ ဇော်မိုးကို အကူအညီအဖြစ် ဖိတ်ခေါ်ကာ due date သတ်ရန် ကြိုးစားနေလေသည်။ မောင်မြင့်၏ စာသင်ခန်းတွင် ထိုင်ခဲ့သော ခုံလေး၏ မျက်နှာပြင်မှာ နဂိုက သစ်သား သုံးပြား ဆက်ထားသော မျက်နှာပြင်တစ်ခု ဖြစ်၍ အချိန်ကြာလာသောအခါတွင်မူ သံများလျော့ရဲကာ အဆက်နေရာများက ပိုဟလာပြီး တင်ပါးကို ညှပ်မိနေခြင်းဖြစ်သည်။ ထို့ကြောင့် သတိထား ထိုင်နေရသည်။ ဒေါက်တာသန္တာ၏ ခုံတန်းရှည်လေးမှာ နောက်တစ်နေ့ နံနက်တွင် တစ်ဦးတည်းသော သမီးရှင် ဦးဘဝင်း၏ အိမ်ရှေ့၌ စာနှင့်တကွ ရောက်လျက်ရှိသည်။ ထိုစာမှာ “တုံကင်ယူ၍ တန်းစီပါ” ဟူ၍ ဖြစ်လေသည်။

ထိုနေ့က အောင်လင်း၏ တစ်လေကျော်ကြာ couple seat စီမံကိန်းကြီးလည်း ဆုတ်ဖြဲခံခဲ့ရသော ရေမွှေးစက္ကူစများနှင့်အတူ မယ်လေးခင်၏ ဖိနပ်အောက်တွင် ကျိုးကြေ ကြေမွ ပျက်စီးခဲ့လေသည်။ တရားခံမှာ ရည်းစားစာ စကားလုံးများကို rap သီချင်း စာသားများမှ ဇော်မိုးက ကူးယူခဲ့ခြင်းကို hip-hop ဂီတ ပရိတ်သတ်တစ်ယောက်ဖြစ်သော မယ်လေးခင် သိနေခြင်းကြောင့် ဖြစ်လေသည်။ ထိုင်ခုံများ ဖန်တီးရာ ပုံစံနှင့် ဒီဇိုင်းတွင်လည်း အစက ရိုးရှင်သော ခြေလေးချောင်းထောက် ခွေးခြေများမှသည် ဆုံလည်ကုလားထိုင်များ၊ ခြေထောက်တင်နိုင်သော၊ ကျောခင်း နောက်မှီနိုင်သော၊ ကြွက်သားများကိုပင် အလိုလျောက် နှိပ်ပေးနိုင်သော နောက်ဆုံးပေါ် ထိုင်ခုံများအထိ နည်းပညာသစ်များ၏ စွမ်းပကားဖြင့် ပေါင်းစပ်တီထွင်မှုများ ရှိလာခဲ့သည်။ ဘီလျံနာကြီးသည် အလုပ်စားပွဲရှိ ထိုင်ခုံကို အနည်းဆုံး တစ်လတစ်ခါမှသာလျင် အသစ်လဲနိုင်သော်လည်း လမ်းဘေး ဈေးသည်များမှာ တစ်ရက်တစ်ခါ ထည်လဲ ပြောင်းနိုင် နေသည်ကို တွေ့ရသည်။ သူတို့၏ ထိုင်ခုံများမှာ တစ်ခါတစ်လေ ခွေးခြေအပု၊ တစ်ခါတစ်ရံ ဖက်ရွက်ခင်း၊ တစ်ခါတစ်လေ ဂုန်နီအိတ်၊ တစ်ခါတစ်ခါ ကတ်ထူပြား၊ တစ်ခါတစ်လေ ဖိနပ်ခုနှင့် သံမံတလင်း၊ ပလက်ဖောင်း အစသဖြင့် တစ်နေ့တစ်မျိုး မရိုးအောင် လဲနိုင်ကြပေသည်။

သူများတွေလို အတန်းမစမီ ခုံအကောင်းနှင့် လဲထားရန်မှာလည်း ကျောင်းပုံမှန် နောက်ကျလေ့ရှိသော မောင်မြင့်အဖို့ မဖြစ်နိုင်။ မျက်မှန်ဝယ်ရန် မတတ်နိုင်သော သူ့အတွက် အတန်းရှေ့က ထိုခုံနေရာလေးသည် တကျီကျီ (သို့မဟုတ်) တကျွီကျွီမြည်သံနှင့် မြေဖြူမှုန့်ရှူ၊ သင်ပုန်းဖျက်၊ တင်ပါးညပ်ရုံမှလွဲ၍ အားလုံး အဆင်ပြေ၏။ ၂၀၁၀ခုနှစ်တွင် သိပ္ပံပညာရှင်များက မည်ကဲ့သို့သော ထိုင်ခုံအသစ်အဆန်းများကို တီထွင်အုံးမည်နည်း။ ဦးဘဝင်းလည်း ခုံနှင့်စာကို မြင်လျှင်မြင်ချင်းပင် ဒေါသထွက်လျက် အနီးရှိ ခွေးခြေအပုလေးကို ပိတ်ကန်လိုက်ရာ အစထွက်နေသော သံစနှင့် ခြေထောက် ခြစ်မိပြီး ထိုနေ့အဖို့ မသန္တာ၏ ဈေးဦးပေါက်လူနာ ဖြစ်ခဲ့လေသည်။ (ဆေးထိုးအပ်ထဲမှ ဆေးရည်မှာ မေးခိုင်ကာကွယ်ဆေးဟု ဖော်ပြရန် လိုအပ်မည် မထင်ပါ၊ သို့သော် အစစ်ဖြစ်ကြောင်း အာမ မခံ။)

သေချာကြည့်လျှင် ကျွန်တော်တို့ နေထိုင်ရာ ကမ္ဘာမြေကြီးသည်လည်း တိုက်တာ အဆောက်အဦး၊ မြစ်ပင်လယ်နှင့် တောင်တန်းများ စုပြုံနေထိုင်ရာ ထိုင်ခုံကြီးတစ်လုံး ဖြစ်လေသည်။ ကျွန်တော့်အဖို့ မြင်းများမှာမူ ဒြပ်လည်းရှိ၊ အသက်လည်းရှိ၍ လိုက်ပါစီးနင်း ရွေ့လျားနိုင်သော ထိုင်ခုံများနှင့် တူသည်။

သူတောင်းစားတို့အတွက် အလုပ်ချိန်အတွင်း လိုက်ဖက်သော ထိုင်ခုံမှာ မပြောင်းလဲသော မြေကြီး ဖြစ်လေသည်။ သို့သော် ထိုင်ခုံတစ်ချို့ပေါ်တွင် ထိုင်နေသော သူတောင်းစား တစ်ချို့လည်း ရှိသည်။